ဒီနေ့မှာတော့ ကွန်ပျူတာတွေမှာအသုံးပြုတဲ့ RAM အကြောင်းကို ဗဟုသုတအနေနဲ့မျှဝေပေးလိုက်ပါတယ်.
……………
RAM ဆိုတာ Random Access Memory ဖြစ်ပါတယ်။
Read/Write Memory, Volatile Memory (or) Short time Memory လို့လည်းခေါ်ကြပါတယ်။ RAM ဆိုတာ ကွန်ပျူတာဖွင့်နေစဉ်အတွင်းမှာ data အချက်လက်တွေကို ယာယီမှတ်ထားပေးတာပါ။
ကွန်ပျူတာပိတ်လိုက်တာနဲ့ မှတ်ခဲ့သမျှ data တွေ အကုန်ပျက်ကုန်ပါတယ်။ RAM ဟာဆိုရင် Hard Drive နဲ့ CPU ရဲ့ ကြားခံဖြစ်ပါတယ်။
တစ်နည်းအားဖြင့် CPU ကလက်ရှိအလုပ်လုပ်နေတဲ့ Data တွေ၊ Program တွေကို RAM က store လုပ်ပေးရပါတယ်။ အဲဒါကိုရှင်းအောင်ပြောရမယ်ဆိုရင် CPU ကသူအလုပ်လုပ်ချင်တဲ့ Data တွေကို Hard Drive ဆီကနေလှမ်းပြီး Access လုပ်ရပါတယ်။ CPU ရဲ့ Speed ကအရမ်းမြန်ပါတယ်။ Hard Drive ရဲ့ Speed က အရမ်းနှေးပါတယ်။
ဒါကြောင့် သူတို့နှစ်ခု Matchဖြစ်အောင် RAM က ကြားကနေဝင်ကူညီရတာပေ့ါ။ ဘယ်လိုကူညီတာလဲဆိုတော့ CPU က ယခုလောလောဆယ် သူအသုံးပြုနေတဲ့ Data တွေကို Hard Drive ဆီကိုသွားမယူတော့ပဲ လက်ရှိအသုံးပြုမယ့် Data တွေကို RAM ပေါ်မှာ ဆွဲတင်ထားလိုက်ပါတယ်။ အဲဒီနောက် CPU က သူလိုချင်တဲ့ Data တွေကို Hard Drive ဆီကနေလှမ်းမယူတော့ပဲနဲ့ RAM ဆီကနေပဲ လှမ်းယူအသုံးပြုပါတယ်။ ဒါကြောင့် မိမိလုပ်နေတဲ့ အလုပ်တွေလည်း နှောင့်နှေးကြန့်ကြာမှုမရှိတော့ဘူး။
RAM ရဲ့ Memory ပမာဏ ကို တိုင်းတာတဲ့ အခါမှာ Byte(B) နဲ့ တိုင်းတာပါတယ်။ ဉပမာ 1GB ,2GB ,4GB ,8GB ,16GB ,32GB, အစရှိသဖြင့်ဖြစ်ပါတယ်။ Byte များလေ ယာယီသိမ်းနိုင်တဲ့ ပမဏများလေဖြစ်ပါတယ်။ Ram ရဲ Speed ကိုတော့ Hz နဲ့တိုင်းတာပါတယ်။ ဥပမာ 1600MHz, 3200MHz....အစရှိသဖြင့်ဖြစ်ပါတယ်။
Ram တစ်ချောင်းဝယ်တော့မယ်ဆိုရင် Memory အပြင် Speed ကိုပါထည့်စဉ်းစားပေးရပါမယ်။ Ram တစ်ချောင်းထဲစိုက်တာဆို ကိစ္စမရှိပါဘူး။ နှစ်ချောင်းစိုက်ရင်တော့ Speed တူတာမစိုက်မိရင် နိမ့်တဲ့ Speed နဲ့ပဲသွားနေမှာ ဖြစ်ပါတယ်။ နိမ့်တဲ့ Speed နဲ့ သွားနေတဲ့အတွက် Speed အပြည့်မတက်လို့ စက်လေးနေတက်ပါတယ်။ မိမိကွန်ပျူတာမှာရှိတဲ့ RAM ရဲ့ Speed ကိုသိချင်တယ်ဆိုရင်တော့ Window Key နဲ့ R တွဲ နှိပ်လိုက်ပါ။ Run Box လေးကျလာရင် dxdiag လို့ရိုက်ပြီး ကြည့်လို့ရပါတယ်။
RAM မှာ အမျိုးအစားများစွာ ရှိပါတယ်။
---------------------
DRAM (Dynamic random access memory), နဲ့ SDRAM (Synchronous dynamic random access memory) စသဖြင့် မတူညီတဲ့ အခေါ်အဝေါ်များစွာ ရှိပါတယ်။ အခေါ်အဝေါ်နဲ့ အမျိုးအစားများ ကွဲပြားနေပေမယ့် RAM ရဲ့ အခြေခံအလုပ်က တူညီပါတယ်။
RAM အမျိုးအစားတွေကတော့ DDR4, DDR3, DDR2, DDR ဖြစ်ပြီး အများဆုံး တွေ့ရတဲ့ RAM အမျိုးအစားကတော့ DDR4 ဖြစ်ပြီးတော့ စက်အဟောင်းများမှာတော့ DDR, DDR2, DDR3 များကို အသုံးပြုထားကြပါတယ်။ Generation တစ်ခုချင်းစီမှာ Physical ပိုင်းအရ ပြောင်းလဲမှုများလည်းရှိပါတယ်။
Video, Game ကဏ္ဌမှာတော့ VRAM (Video RAM) ကို အသုံးပြုကြပါတယ်။ VRAM ဟာဆိုရင် Graphic Chip အတွက် Ram ဒါမှမဟုတ် Graphics Card မှာ တည်ဆောက်ထားခြင်းဖြစ်ပါတယ်။ GDDR လို့ ခေါ်ကြပါတယ်။ ယနေ့ခေတ် Graphics Card အများစုမှာ GDDR 5 ကို အသုံးပြုကြပြီး အချို့မှာတော့ GDDR5X ကို အသုံးပြုလာကြပြီဖြစ်ပါတယ်။
သင် RAM ပမာဏ ဘယ်လောက်လောက်လိုအပ်မလဲ?
------------------------
ယနေ့ခေတ်မှာ တော့ Smart Phone တွေအများစုမှာတောင် RAM 4GB နဲ့အထက်ပါလာပါပြီ။ Computer အသုံးပြုသူအများစု အနေနဲ့ကတော့ အထွေထွေသုံးအတွက်ဆိုရင် အနည်းဆုံး 4GB လောက်လိုအပ်ပါမယ်။ Operating System တွေမှာ သူ့တို့လိုအပ်ချက်နဲ့သူတို့ရှိပါတယ်။
ဥပမာအနေနဲ့ဆိုရင် Windows 10 ကို RAM 1GB ရှိတာနဲ့ run လို့ရပါတယ်။ Run လို့ရတာပါ။ RAM 1GB ထဲနဲ့ သုံးဖို့ဆိုရင်တော့ တော်တော်လေးကိုနှေးကွေးနေပါလိမ့်မယ်။ သင်ဟာ Word file ၆ ခု လောက်ကို တစ်ပြိုင်နက်ဖွင့်ထားတယ်၊ Chrome tab လေး၊ ငါးခုလောက်ကို အမြဲဖွင့်ထားမယ်ဆိုရင်တော့ RAM အနည်းဆုံး 8GB လောက်လိုအပ်ပါမယ်။ Performance Boost လုပ်ချင်ရင်တော့ RAM တိုးလိုက်တာက အမြန်ဆုံးနဲ့ အလွယ်ကူဆုံးပါပဲခင်ဗျာ။